GIILA na sa Davao City Police Office (DCPO) ang primary suspect sa pagpatay sa dalaga sa Saint John, Barangay 76-A, Bucana, Davao City niadtong miaging semana.

Sa impormasyon nga gipadala ni Police Captain Ma. Theresita Plaza-Gaspan, tigpamaba sa DCPO, nga ang suspek mao si Benjie Paustino Matanggo, 25-anyos, pintor, residente sa Barangay Culaman, Jose Abad Santos, Davao Occidental.

Sumala ni Gaspan nga hangtud ning panahona, gawasnon pa ang suspek kinsa misibat human sa hitabo.

“Wala pa nasikop ang suspect, ongoing pa atong coordination sa JAS Municipal Police Station for possible nga boluntaryo kini nga motahan sa kaugalingon diin tabangan kita ni Vice Mayor Joyce sa JAS,” ingon ni Gaspan.

Kahinumdoman nga nagbitay nga wala nay kinabuhi sud sa kuwarto ang biktima nga si Rica (bansagon gipatago), 20-anyos, dalaga, fresh graduate sa kursong Accountancy.

Ang suspek nag-renta og kuwarto sa boarding house nga gipanag-iyahan sa biktima diin dungan sab kining nahanaw human sa hitabo.

“Nabutang nga kini atong primary suspect subay sa atong na-gather nga data pinaagi sa atong mga investigators,” dugang ni Gaspan.

Hinuon, suma sa kapulisan nga kung masikop ang suspek, duna kini katungod sa pagdepensa sa iyang kaugalingon aron ipasabot ang pasangil ngadto kaniya. (Jeepy P. Compio)