TAGUM CITY -- Blangko pa ang kapulisan sa Tagum City Police Station sa matudlong suspek sa pagpusil-patay sa usa ka babaye alas 5:55 sa hapon niadtong Huwebes, Agosto 8, atubangan sa Tagum Longford College, Dalisay Gante Road, Barangay Magugpo West.

Ang kapulisan sa Tagum nag-ila sa biktima nga si Vicky Baniega Pelenio, 29-anyos, empleyado sa Moto-R Republic, LYR Company ug residente sa Purok 7, Brgy. Bankerohan, Catarman Northern Samar.

Patay na nga gideklara ni Dr. Fajjar A. Kashim ang biktima human gisulayan kini’g dala sa Davao Regional Medical Center.

Sa inisyal nga imbestigasyon, migula nga nagbaktas ang biktima sa pathway sa Dalisay Gante Road dihang kalit mibutho ang nakamotor ug kalit nga namusil.

Gilayong nahagba ang biktima kinsa nagkulob kini nga naglunang sa dugo.

Ang kapulisan nakahipos og usa ka basiyo sa bala sa kalibre .45 nga pistola nga maoy gigamit sa pagpamusil.

Sumala sa kapulisan, posibleng personal nga dumot ang hinungdan sa krimen, apan padayon silang nag-imbestiga unsay motibo sa pagpamusil.

Sa nakalabay nga AFP-PNP Press Conference, gibutyag ni Police Major Jason Baria, tigpamaba sa Police Regional Office-Davao Region, nga ila nang gipalawman ang imbestigasyon sa sunod-sunod nga pagpamatay nga nahitabo sa Tagum City. (Jeepy P. Compio)