DAVAO DEL NORTE -- Lalaki nga dugay nang pinangita sa balaod gumikan sa kasong lugos nasubay nga namasada og tricycle, hinungdan nga nasignit sa kapulisan didto sa Pacpoda Terminal sa JP Laurel St., Barangay New Pandan, Panabo City alas 12:20 sa udto niadtong Lunes.

Ang suspek mao si Alvin Lausa Montealto, 39, minyo, molupyo sa Purok 3, Barangay Katipuan, sa nahisgutang siyudad.

Subay sa taho, nasayran nga ang suspek nasikop pinaagi sa mga personahe sa Panabo City Police Station, ubos sa pagdumala ni Police Lieutenant Colonel Ernesto M. Gregore dihang ang suspek nasiplatan sa nahisgutang barangay.

Ang pagdakop kang Montealto nahisubay sa warrant of arrest nga giisyu ni Judge Jesus L. Grageda sa Regional Trial Court Branch 4, Panabo City sa kasong lugos nga dunay Criminal Case Number 147-2007, pinetsahan og Agosto 2, 2007.

Way girekomendang piyansa ang korte sa kaso sa suspek. (Dexter T. Visitacion)