NAKATAKDANG pasakaan og kasong murder si Rico Jay Lauron Labao, 27, residente sa Barangay Matina Pangi, Davao City, human gi-admitar niini ang krimen sa pagpatay sa sais-anyos nga si alyas Sheila.

Kahinumdoman nga nakit-an ang patay'ng lawas sa bata Dominggo sa buntag diin mismo ang suspek ang mitaho nga naay nadugta nga lawas sa biktima sa Purok 11, Kilometro 9, Barangay Matina Pangi.

Apan nagduda ang kapulisan sa Talomo Police Station sa palahi-lahi nga tubag sa mga pangutana mao nga gipa-ilalom kini sa imbestigasyon.

Samot pa nagduda ang mga pulis dihang nakita ang susamang dagway sa electrical wire nga gigapos ug gibutang sa liog sa batang biktima didto sa balay ni Labao sa Morio-Morio Kilometro 8.5, susamang barangay.

Hapon sa adlaw nga Dominggo, mipakita sa Talomo PNP ang usa ka mag-asawa diin ilang gitug-an nga una pa nakita ang patay'ng lawas sa bata, nakit-an nila si Labao nga nagpas-an og bunot sa lubi ug paadto kini sa lugar kung asa nakita ang patay'ng lawas sa biktima.

Dihang gikompronta sa inahan sa biktima ang suspek, mitug-an kini nga siya ang mipatay sa bata, dungan sa pagpangayo og pasaylo.

Sa pakighinabi sa SuperBalita kang Senior Inspector Ma. Teresa Plaza-Gaspan, Davao City Police Office (DCPO) spokesperson, nga kasong murder ang ilang ipasaka batok sa suspek samtang gipailawom sa otopsiya ang patay'ng lawas sa biktima.

“Murder ang i-file nato nga kaso batok sa suspek; so far wa pa migula ang resulta sa autopsy, didto na nato makita kung namolestiya kini, atoa lang i-update na sab ang kaso,” sulti ni Gaspan.

Sa karon, padayon nga nakabalhog ang suspek sa selda sa Talomo PNP. (Jeepy P. Compio)