NIPAGAWAS og kumpirmasyon ang dakbayan sa Digos nga adunay usa ka pasyente ang nag presumptive-positive sa coronavirus disease (Covid-19) adlaw’ng Sabado, Marso 28.

Subay sa inisyal nga testing sa Southern Philippines Medical Center (SPMC) sa Davao City, usa ka 38-anyos nga lalaki nga gituohang niadto sa New Matina Davao Gallera niadtong Marso 6-13, 2020, ang nag presumptive-positive apan gikinahanglan pa ang kumpirmasyon.

Ang maong confirmatory testing pagabuhaton sa Research Institute of Tropical Medicine (RITM), diin gipadala na ang iyang specimen.

Sa kasamtangan, ang maong pasyente na-admit na sa isolation unit didto sa SPMC ug anaa na sa stable ang kahimtang niini.

Gumikan niini, mas gihugtan na sa lokal nga gobyerno ang mga precautionary measures batok sa Covid-19, ug giawhag ang publiko nga motuman gyud sa social distancing, constant hand washing, ug ang pag-implementar sa curfew sa dakbayan.

Mihimo na sab ang City Health Office ug Barangay Health Emergency Response Team og contact tracing sa mga nakaduol sa maong pasyente.

Niadtong Biyernes, si Mayor Josef Cagas nagpaguwa og laing Executive Order No. 25 aron mohimo og dugang lakang nga di mokatap ang Covid-19 sa 26 ka mga barangay sa siyudad.

Sa mando ni Mayor Cagas, gitahasan niini ang mga law enforcers ug Inter-Agency Task Force Covid-19 nga di tugtan nga mohunong sa dakbayan ang tanang sakyanan ug mga tricycle nga moagi sa ilang dalan padung sa laing teritoryo o lokal nga gobyerno.

Kinahanglan sab nga motuman kini sa mga balaod nga ginahimo sa tanang checkpoints sa mga entradang parte sa siyudad.

Gitugtan lamang ang pagbaligya ug pagpamalit og ilimnong makahubog gikan alas 8 sa buntag hangtud alas 5 sa hapon, apan dili mahimong mag-inom sa pampublikong lugar.

Bugtong mga trabahante nga adunay ID sa ilang kumpanya ang wa’y labot sa community quarantine, apil ang mga nagunit og quarantine pass aron makapamalit og pagkaon, tambal ug ubang kinahanglan sa ilang balay gawas kung mga sakop sa frontliners, medical team ug mga law enforcers. (OBD)