KIDAPAWAN CITY -- Ilhan na ang mga suspek nga nagpusil patay sa doctor niadtong Biyernes sa Pikit, North Cotabato.
Gilangkuban ang Task Force Cadulong sa kapulisan sa Cotabato City Police Office, uban sa Criminal Investigation and Detection Group (CIDG).
Si Dr. Robert Cadulong, kinsa maoy tag-iya sa Cadulong Medical Hospital, nag-jogging sayo sa buntag sa maong adlaw sa Barangay Poblacion sa lungsod sa dihang giduol sa mamumuno og gipusil.
Namatay ang biktima human makaangkon og siyam ka mga igo sa mga bala sa lawas gikan sa gituohang kalibre .45 nga pistola.
Gitahasan ni Pikit Mayor Sumulong Sultan ang mga pulis sa Pikit Municipal Police Station nga moabag sa hugtanon nga imbestigasyon sa pagpatay sa doktor.
Tumbok na ang duha ka suspek nga nagpatay sa doktor apan dili pa ikabutyag ngadto sa publiko gumikan padayon pa ang imbestigasyon ug paglutos sa kapulisan. (Edgar E. Fuerzas)