WALA pa nagpagawas og report ang Digos City Police Station labot sa usa ka patay nga lawas nga napalgan sa sagbutang bahin sa Matti, Barangay Tres de Mayo ning Siyudad sa Digos.

Sa hulagway nga gi-post sa netizen nga si Gloria Fe Abenoja Beron sa iyang Facebook, nagbuy-od ang usa ka tawo, diin wala sab niini gibutyag kon babaye ba o lalaki ang biktima.

Hinuon, gihulagway niini nga ang patay nga lawas sa biktima nakit-an sa Kurbada Matti, diin gibaatan og tape ang baba ug gigapos ang tiil ug kamot.

Hunyo 25, 2022 pa na-post ni Beron ang maong hulagway diin hangtud ning pagsuwat sa balita, wala pa nakapagula og spot report ang Digos City police.

Gisulayan sa Superbalita Davao ang pagkuha sa bahin sa Digos police pinaagi sa station commander niini nga si Police Lieutenant Colonel Hamlet Lerios, apan pakyas ang tigsuwat.

Wa sab pulis nga mitubag sa group chat sa DavSur AFP-PNP Press Corps.

Sumala sa mga residente sa dapit, gituohang gisalbids ang biktima diin gipatay sa layo ug gilabay sa dapit.

Ning kasamtangan ang patay nga lawas sa biktima anaa sa usa ka lokal nga punerarya sa Digos City.