HUMAN sa unom ka tuig nga pagtago-tago, nakakustodiya na karon sa Digos City Police Station (DCPS) ang lalaking numero uno nga pinangita sa Digos City human madakpi.

Natultulan sa kapulisan ang gitagoan niini didto sa Purok 4, Barangay New Cebu sa President Roxas, North Cotabato, hinungdang gisilbi dayon ang orden de aresto, ala 1:30 sa hapon, Huwebes, Oktubre 8.

Si Lieutenant Colonel Vici Anthony Tababa, hepe sa DCPS, nag-ila sa dinakpan nga mao si Eric Esma Espritu alyas Barik, 32, minyo nga way trabaho.

Nag-alayon ang DCPS sa Criminal Investigation and Detection Group, President Roxas Municipal Police Station ug 45th Special Action Company sa pagsikop sa suspek.

Ang Regional Trial Court Branch 20 maoy nagpagawas sa warrant of arrest sa suspek nga gilagdaan ni Presiding Judge Magnolia Velez niadtong Hunyo 2, 2014, nga way girekomendang piyansa tungod sa kasong pagpatay. (Orlando B. Dinoy)