KIDAPAWAN CITY -- Buak ang ulo sa traysikel drayber human gipusil alas 6:40 sa gabii, Lunes, sa siyudad.

Giila ang biktima nga mao si Joel Pesquera, 44, minyo, molupyo sa Purok Guava, Brgy. Poblacion.

Sumala kang Police Lieutenant Colonel Joyce Birrey, hepe sa Kidapawan City Police Station nga sakay ang biktima sa gimaneho niyang traysikel sa dalang Sinsuat ug pauli na unta sa balay sa dihang nahitabo ang pagpamusil.

Sumala pa nga nibangga ang traysikel sa kural nga kawayan daplin sa kalsada ug namatay si Pesquera human maigo sa ulo ug nawong.

Nasayran nga ang biktima nag-atubang og kasong lugos sa korte nga gituohang dunay kalabutan sa pagpatay kaniya.

Apan kapulisan sa siyudad padayon pang nangalap og dugang mga impormasyon aron matumbok ang tinuod nga hinungdan sa pagpatay sa biktima. (Edgar E. Fuerzas)