PIPILA ka adlaw una ang kasaulogan sa Adlaw sa mga Patay, mga pantiyon sa sementeryo sa Maragusan, Davao de Oro gipangbangagan.

Gi-post ni Eduard Fernandez Ellorin Jr. sa iyang Facebook account ang pipila ka mga hulagway niadtong Lunes, Oktubre 18, kon diin mga pantiyon sulod sa Mapawa Cemetery makita.

"Unsay trip aning mga tao nga gipangbangagan man ang mga pantyon, nakita namu ganena while gataod mig tent sa gilubngan sa akong amahan," suwat ni Ellorin sa post.

Sa paghinabi kaniya agi sa online, tua siya sa sementeryo mga bandang alas 5 sa buntag aron nga mopabarog og tulda alang sa prayer vigil alang sa siyang namatay nga amahan, sa dihang nakamatikod nga pipila ka mga pantiyon dunay mga lungag.

Iyang gi-post ang mga hulagway aron nga masayod kadtong dunay mga mahal sa kinabuhi nga nalubong sa maong sementeryo.

Dugang ni Ellorin nga base sa mga komento sa iyang post, dunay pipila ka mga tawo nga interesado sa "tuway-tuway" sa tuhod sa mga patay.

Sumala sa mga miaging mga taho, ang tuway tuway gigamit isip anting-anting ilabi na sa mga manambalan.

Si Ellorin, kinsa nakabisita sa maong sementeryo sa miaging mga tuig, nagbutyag nga kini maoy una niyang higayon nga nakasianti og ingon niini nga insidente.

Apan ang World Health Organization (WHO) nagpahimangno sa bisan unsang pisikal nga kontak sa mga patay kay risgo kini sa ilang panglawas.

"To those in close contact with the dead, such as rescue workers, there is a health risk from chronic infectious diseases which those killed may have been suffering from and which spread by direct contact, including hepatitis B and hepatitis C, HIV, enteric intestinal pathogens, tuberculosis, cholera and others," matud sa WHO.

Naningkamot pa ang SunStar Davao nga dunay mahinabi nga mga awtoridad Maragusan bahin sa maong insidente.