MINGBAHA ang komento sa mga netizens diha sa social media dihang migula ang mando sa Inter-Agency Task Force (IATF) on Covid-19 nga ibalik ang pag-istrikto sa community quarantine sa Davao City luyo sa pagtaas sa kaso sa Covid-19.

Gilayong mipagula og kamandoan si Davao City Mayor Sara Duterte-Carpio nga sugod Oktubre 15, 2020, istriktohan ang oras sa curfew.

Sa kamandoan, magsugod na sa alas 7 sa gabii hangtud alas 5 sa sayong kabuntagon ang curfew, butang nga sayo na magsirado ang mga namaligya sa Roxas Night Market.

Nasayran nga alas 5 na sa hapon magsugod ang pag-abli sa Roxas Night Market padung alas 7 sa gabii, butang nga gika-komento sa mga netizens.

"Kung nagpaluto ko'g barbeque, then mokaon ko, then mora'g mabutang nga wala pa nahuman akong katuyoan sa Roxas, masugatan na ko'g pulis. May pa'g isirado na lang nila, alanganin ra," ingon ni Rachelle (nagpatago sa bansagon), taga Barangay Buhangin Proper, Davao City.

Naguol sab kaayo ang usa ka tindera og pagkaon sa Roxas gumikan nangutang siya og kuwarta aron ikapital apan karon dako iyang pagtuo nga di niya kini mabawi.

"Pakyas gyod, bagsak, unsaon ta nga alas 5 to 7pm unsay makita ana, igo ra human og arrange, close na pod kay ala 7 na," ingon sa usa sa mga nanag-iya og puwesto sa night market.

Alang ni Rhodora Garces, 56 anyos, nga taga Trading Boulevard, Davao City, "kung kini ang nakaayo sa atong panahon karon sa pandemya wala tay mahimo, mosunod gyod ta, dili pod ni tanang panahon ingon ani."

Sa kamandoan, ang tanan molambigit sa bag-ong oras sa curfew, apan dunay mga gawasnon niini, sama sa mga frontliners, mga trabahante sa mga essentials (panginahanglanon) diin ang identification card sa kompaniya ikapakita uban sa pagpamatuod sa iyang oras sa paggawas ug pagsulod sa trabahoan.