ARON maseguro nga luwas ang mga boto ug hapsay nga pagpahigayon sa eleksiyon sa Mati City, Davao Oriental, nagpahigayon og Voting Simulation Exercise ang Commission on Elections (Comelec) kauban ang Davao Oriental Provincial Police Office didto sa Don Luis Rabat Senior Memorial School sa Barangay Dahican.

Gihimo ang step-by-step voting process sama sa verification, temperature check ug ang mismong proseso sa pagboto.

Kini aron mahibal-an kon kondisyon ba ang makina ug sa mga pamaagi sa pagpatuman sa health protocols batok Covid-19 ubos sa new normal diha sa mga voting precinct.

Sumala ni Police Colonel Efren Orlina, hepe sa Davao Oriental Police Provincial Office, tumong niini ang paghimo sab nila og video sa paghatag og impormasyon ngadto sa publiko og unsay angayan nilang himuon labi na nga kinahanglan ang pag-amping kay usa ka super-spreader event ang eleksiyon.

Sa Davao City, nagpahigayon sab og Comelec roadshow ang ahensiya sa usa ka mall sa Ecoland, Davao City Miyerkules sa buntag.

Ang roadshow gihimo aron masinati ug makat-on ang mga botante nga maggamit og vote counting machine kun VCM.