OSPITAL ug prisohan ang napadulngan sa duha ka mga panday human nagrambol dihang naglalis kay wala na'y mipalit og beer sa ilang pagtagay Dominggo sa gabii, Enero 27, sa Barangay 2-A, Magallanes, Davao City.

Mitugpa sa Southern Philippines Medical Center (SPMC) ang usa ka lalaki nga si Roldan (bansagon gitago) 26, kay nabunalan og puthaw sa kainom niini nga si Allan (bansagon gitago) 33, pulos nagpuyo sa Caburan, Jose Abad Santos, Davao Occidental.

Nasayran nga nag-inom ang duha sa bunkhouse nga ilang gitrabahoan ug dihang wala nay mainom nga beer, mikaransa si Allan kay nagpasalig si Roldan nga siya napod ang mopalit kung mahurot na ilang giinom.

Misamot sab ang kasuko ni Allan human atol sa ilang panag-inom nahisgutan ni Roldan nga iyang nauyab ang hinigugma ni Allan.

Dihang mikaransa si Allan, mikuha kini'g puthaw ug didto giayo'g puspos si Roldan.

Nakahiagom og daghan bun-og ug samad ang biktima hinungdan nga nanawag og pulis ang ilang mga kaubanan nga miresulta sa pagkasikop sa suspek samtang ang samaron gidala sa ospital.

Sa kasamtangan, priso ang suspek kinsa mag-atubang og kaso didto sa korte.