Ang ikaduhang hugna sa padayong Philippine Sports Commission (PSC) National Sports Coaching Certification program midani og 100 partisipante sa Davao del Norte Sports and Tourism Complex sa Tagum City.

Gibutyag ni Ed Fernandez PSC-Philippine Sports Institute (PSI) Mindanao cluster head, ngadto sa SunStar Davao nga ang mga delegado nagagikan sa Department of Education (DepEd) Compostela Valley, DepEd Mati ug DepEd Davao Oriental divisions, apil na gikan sa nagkadaiyang pribadong tulunghaan ug lokal nga kagamhanan sa Banaybanay.

“It has the same content as the first batch catered last year,” tug-an ni Fernandez.

Ang level 1 course naghisgut bahin sa Sports Philosophy ug Principles of Coaching, Sports Ethics, Sport Physiology, Sport Psychology, Talent Identification, Sport Pedagogy ug Sport Specific Skills Training.

Sa pamahayag, gisulti ni PSI deputy director Marlon Malbog nga ang grassroots coaching course mao ang gimando ni PSC Chairman William “Butch” Ramirez kinsa buot sa mga coaches nga hitsas sa pagpausbaw sa level of competitiveness sa grassroots nga mga atleta.

Gisulti ni Professor Henry Daut nga ang unang duha ka adlaw mahimong “theoretical in nature” samtang ang tulo ka nahabiling mga adlaw “practical exams” ug “sports specific training” uban sa national coaches.

Ang mga manudlo naglakip kang Prof. Josephine Reyes (sports physiology), Prof. Robert Jurado (sports ethics), Dr. Katrina Trinidad (sports psychology) ug Luis Serafin Cosep (sports pedagogy). (MLSA)