GIPASALIG sa Department of Education (DepEd)-Davao kagahapon nga walay direktang hulga sa pagpahigayon sa Davao Region Athletic Association (Davraa) Meet 2019 atol sa security briefing niadtong Martes sa Malayan Colleges Mindanao sa Matina ning siyudad sa Davao.

Si Deped 11 spokesperson Jenielito “Dodong” Atillo, kinsa bisita, uban ni Deped curriculum and learning management division chief Janette Veloso, nagbutyag niini atol sa Davao Sportswriters Association (DSA) Forum kagahapon sa Annex of SM City Davao.

Matud niya, “We heard this from the National Intelligence Coordination Agency (Nica) during the security briefing. Gikalipay og dako ni sa atong security forces but they won't take matters sitting down.”

Gisulti ni Atillo nga kinatibuk-ang 18,631 pulis ug uban pang puwersa ug mga “functionaries” gikan sa lokal ug regional coordinating nga ahensiya ipakatag atol sa usa ka semana nga torneyo alang sa tinun-an sa elementarya ug sekondarya nga atleta.

“We can really vouch that we will be fully secured,” tin-aw niya samtang miapela ngadto sa publiko nga magpabilin nga maigmaton sa pagtaho sa bisan unsang katingad-an nga kalihukan o mga tawo ngadto sa mga awtoridad.

Hugtan ang seguridad sa 30 ka mga billeting centers alang sa mga delegado, technical officials ug kitchen stations lakip na sa mga lugar nga dulaanan ug mga dagkong lugar nga tapukanan sa siyudad.

Kinatibuk-ang 10,000 ka delegado sa mga atleta, coaches, opisyal ug mga “chaperons” gikan sa 11 ka mosalmot nga delegasyon giluman nga moabot sa siyudad sa Davao nga maoy madumala niini pagbalik. (MLSA)