ANG Dabawenyong Paralympian nga si Ernie Gawilan mipakita'g katakos sa Gelora Bung Karno Aquatics Stadium sa Jakarta, Indonesia human niya giguba ang Asian Para Games record sa men's 400-meter freestyle S7 event, human niya makuha ang tulo ka gold medals ug duha ka silvers sa nagpadayong kompetisyon.

Ang 27 anyos nga si Gawilan, nga gikan sa Paquibato District sa Davao City, mipapha sa kanhi rekord nga singko minutos ug 10.18 segundos sa iyang oras nga 4:51.

Nakuha niya ang gold medal samtang ang Chinese Taipei's Chen Liang-Da (5:22.93) mikuha sa silver ug ang pambato sa South Korea nga si Jeon Ga-Eul (5:24.57) mi-labni sa bronze.

Si Gawilan, nga usa ka ilo ug survivor ug abortion attempt, midaug sa nakalabay nga Oktubre 7 sa unang gold medal sa Asian Para Games history human nanguna sa men's 200m individual medley SM7 event.

Ang iyang ikatulong bulawan gikan sa men's 100m freestyle S7 diin mioras siya og 1:08, gipildi ang Hapon nga si Hosokawa Hiroshi (1:14.12) ug Thai nga si Sittichaiphonniti Kaweewat (1:16.62).

Ang manlalangoy mikolekta sab og duha ka silver sa men's 50m freestyle 7 ug men's 100m backstroke S7.

Si Gawilan, sa iyang Facebook niadtong Sabado, Oktobre 13, nagkanayon: "Unang una po sa lahat, nagpapasalamat po ako sa lumikha at nagbigay ng talento sa akin at sa mga taong naniniwala sa kakayahan ko, at sa mga kasamahan ko sa mga coaches ko."

Gipasalamatan sab niya ang mga coaches nga sila Ral Rosario, Tony Ong, Majonie Palumbarit ug Mark Jude Corpuz.

Nagpasalamat sab siya sa NPC Philippines, Philspada, Toyota Philippines ug Toyota International, Our Lady of Victory training center, Philippine Sports Institute ug Philippine Sports Commission sa ilang dakong suporta, Speedo Philippines, Trinspire, medical team ug teammates nga nag-ampo kanilang mga Para Games athletes.

"Maraming salamat po. To God be the glory! Mission complete," ni Gawilan.

Subay sa Republic Act 10699 nga nagpalapad sa coverage sa incentives nga ihatag sa national athletes ug coaches, si Gawilan gitakdang modawat og tag-usa ka milyon ka pesos sa iyang tulo ka bulawang medalya ug P500,000 matag usa sa iyang duha ka silver medals.

Kung kwentahon, si Gawilan mokobra og P4 million nga cash incentives gikan sa national government pinaagi sa PSC.