MIPAKITA na sab sa ilang kabangis sa paglangoy ang magsuong Lora Micah ug Liaa Margarette Amoguis, sa Davao City human nangharus og kadaugan sa 82nd Araw ng Davao Swimfest sa Fr. Rudy Malasmas, S.J. swimming pool sa Ateneo de Davao University sa Matina.

Ang Batang Pinoy 2019 Mindanao Leg ug Davraa Meet 2019 champion nga si Lora mitigum og 171 points aron manguna sa girls 13-14 division, mikolekta og lima ka bulawan sa 100m freestyle, 100m butterfly, 50m backstroke, 200m freestyle, 100m backstroke, tulo ka silvers ug usa ka bronse.

“My times were actually fine. I’m kind of satisfied,” ni Lora nga estudyante sa Abba’s Orchard School, sa Facebook interview kaniya sa SunStar Davao.

Ang manghud niyang si Marga, nga mihakot sab og daghang medalya sa Batang Pinoy 2019 Mindanao Leg, miangkon sab og unom ka bulawan (100m freestyle, 200m freestyle, 50m freestyle, 100m backstroke, 100m butterfly, 200m individual medley), tulo ka silver ug duha ka bronse sa Araw swimming competition.

Si Marga, sa pakighinabi kaniya: “I beat some of my time. Some I’m really happy with my performance because I’m not a sprinter but managed to get gold and other medals.”

Giangkon hinuon niya nga gikinahanglan pa niya og dugang pagbansay alang sa mosunod nga kompetisyon.

Sunod nga mopakita og aksiyon ang magsuong Amoguis sa Philippine National Age-Group Swimming Championships.

Mga mananaug midawat og premyo gikan sa city goverment of Davao pinaagi sa Sports Development Division sa City Mayor’s Office (SDD)-CMO. (MLSA)