GIINGONG kung mahan-ay na ang away nila ni Filipino “Quadro Alas” Johnriel Casimero ug Japanese Naoya “Monster” Inoue, nagtuo ang kampo ni Casimero nga mapahigayon kini sa Amerika.

Si MP International Promotions president Sean Gibbons nagkanayon nga angayan lang ipahigayon ang unification bout tali sa duha ka world bantamweight champions sa Amerika hilabi na nga nakapirma na og kontrata si Inoue sa Top Rank Promotions.

Alang kang Gibbons, seguradong natinguha si Top Rank boss Bob Arum nga ipaila si Inoue sa Amerika. Si Inoue kaduha pa lang nakaaway sa gawas sa Japan.

Kon siya lang ang matuman, gusto ni Gibbons nga mapahigayon ang away karong Abril sa sunod tuig apan nagdepende pa kini kon unsa kadali makapaalim si Inoue sa angol nga iyang nasinati atol sa iyang kadaugan batok kang Nonito “Filipino Flash” Donaire Jr. di pa tantong dugay.