ANG host Davao region napabilin ang ikatulong pwesto sa overall medal tally human mikolekta og 70 ka bulawang medalya, 104 ka silver ug 112 ka bronse sa National Prisaa Games 2019 nga natapos, Biyernes sa University of Mindanao (UM) Matina gym, Davao City.

Ang Western Visayas maoy mihari kontra 15 ka mga rehiyon nga namupo og 212 golds, 146 silvers ug 97 bronzes samtang ang Central Visayas mihuman sa ikaduha uban ang 139 golds, 128 silvers ug 80 bronzes.

Nahilakip sa top 10 ang Soccsksargen (44-34-87) sa ikaupat, Cordillera Administrative Region (39-39-25) ikalima, Ilocos Region (35-13-9) ikaunom, Calabarzon (32-26-75) ikapito, Bicol (30-34-56) ikawalo, Zamboanga Peninsula (23-25-25) ikasiyam ug Northern Mindanao (20-40-62) ikanapulo.

Nagsunod sab ang Central Luzon (14-22-52), Cagayan Valley (8-9-23), Caraga (2-0-7), Eastern Visayas (1-5-14), Mimaropa (0-3-23) ug Bangsamoro Autonomous Region in Muslim Mindanao (0-2-5).

Ang nag-unang tulo ka rehiyon midawat og plake lakip na mga outstanding athletes sa duwa nga gisuportahan sa city government of Davao, Philippine Sports Commission, Department of Education ug Commission on Higher Education.

Si National Prisaa president Ma. Lita Montalban, sa iyang mensahe nagpasalamat ni Davao City Mayor Sara Duterte Carpio sa pagtabang sa Private Schools Athletic Association (Prisaa) Region 11 sa hosting sa aktibidad.

"Thank you everyone for making our hosting of the National Prisaa Games 2019 a success especially to Mayor Sara, Deped, Ched, Tesda and PSC, from my staff, the secretariat led by Maam Badet (Lourdes Mission) and project director Boy Sarabia of UM, all the Prisaa member schools in the city, all teachers in the billeting, security personnel who made all of us secure and all of the participating regions who came," ni Montalban, nga mao say pangulo sa Prisaa 11 ug Davao City Prisaa.

Giturn-over sab niya ang Prisaa banner sa host sunod tuig nga mao ang Cagayan Valley, nga mobitbit sa duwa sa Tuguegarao sa 2020.

Ang coverage sa SunStar Davao sa National Prisaa Games 2019 inubanan sa suporta sa Matina Enclaves, Santos Land Development, 8890 Holdings, Inc., Anflocor, Sky Cable ug Pagcor samtang ang minor sponsors Aeon Luxe Properties, Davao Doctors College, GH Office Depot, Grand Land, Inc., Alu Hotel, Davao Medical School Foundation, NCCC ug Office of the Special Assistant to the President.