SI JAMES Catayas sa Davao City gipamatud-an nga di gyud edad ang basehan aron mapildi ang kaatbang, kini human niya gipildi ug makuha ang titulo sa 5th APM Students Online Rapid Chess Tournament, Abril 22 via lichess.org.

Ang 11-anyos nga si Catayas, may username nga jamescatayas2008, mikamada og 32 puntos sa 10 ka duwa.

Si Catayas, estudyante sa Seventh Day Adventist Elementary School, mipildi sa 14anyos nga si Jeremy Marticio sa Laguna ug 13-anyos nga si Mysoul Malabarbas sa Davao City nga miangkon sa sunod nga pwesto.

Si Marticio mihimo'g 28 puntos samtang si Malabarbas may 26 puntos.

Si Catayas napildi sa iyang opening match kontra sa magduduwa nga ang username Smash16, apan nanimawos siya og giangkon ang siyam ka sunodsunod nga kadaugan kontra Morraine Togonon (kaduha) mynameiscecille, mahawanjohnpaul15, Ladybug567, Gabrielle Aton, denzartagag, Hakdogens ug Jusrine Jose Bordios.

Ang taga-Davao City, 15-anyos nga si Wesley Magbanua (26 points), Cherie Gail Hewe sa Butuan City (25), gikan Cotabato ang 13-anyos nga si Nathalie Liscano (24), 10-anyos gikan Davao City nga si Princess Dianna Simbajon (22), taga-Cagayan de Oro City ang 16-anyos Place Ashlanie Pandi (19 points), pambato sa Davao City, ang 17-anyos Edmar Llanto (19) ug taga-Tagum City, ang 9-anyos nga si Place Denz Arthur (19) maoy mikumpleto sa top 10.

Samtang si organizer Ely Acas nagkanayon nga ang 6th APM Students Online Blitz Tournament gihimo niadtong Biyernes, Abril 24.

Wa may premyo, apan alang niya, malingaw sab ang players sa pagduwa.

"It will serve as practice games," panapos ni Acas.