WA mahinayon ang gi-atngan nga prestihiyusong Color Manila Challenge Fun Run nga gitambongan sa kapin 1,500 partisipante didto sa SM Lanang Parking Lot naidtong Dominggo, Agosto 11.

Gi-anunsyo sa mga organizers sa kalihukan nga ang suplayer sa medalya, 'obstacles, ug color patches' wala maabot hinungdan nga nakanselar kini.

Tungod niini, nadismaya ang mga runners sa nahitabo diin lima ka oras sila naghulat aron magsugod ang maong fun run.

"Disappointed masyado kasi naghintay kami nang matagal, sabi nila 5:30am mag start tapos 4:30am yung assembly, so nandito na kami on time tapos ganito lang pala mangyayari, palpak, waste of time and effort," ni Elizabeth Ornopia, kinsa usa sa mga mipartisipar.

Usa ka Color Manila staff, miingon nga di sila makasugod sa lumba nga wala ang mga kinahanglang gamit, "If wala po yung obstacles and color patches, it wouldn't be called Color Manila anymore."

Dugang niya nga ang suplayers miingon kanila nga alas 8 sa gabii niadtong Agosto 11 naabot na sila sa Cagayan de Oro City ug gilauman maabot sa siyudad sa Davao City human ang walo ka oras apan wa mitungha.

Gipaneguro sab sa The Color Manila, nga mohatag sila og kumpletong refund, "Wala na kaming magagawa but let the supplier shoulder the refund. Yung shirts and other merchandise, since nabigay na, sa mga nag-register na yun," batbat niya.

Sa pagkakaron, ang nakanselar nga Color Manila Challenge sa Davao City mi-trending sa internet nga gitawag pa "Scam Run" apan wala pay opisyal statement ang Color Manila aron depensahan ang ilang bahin. (Marizz R. Perez)