ANG Mats College of Technology gipakuratan ang nanguna sa bracket, University of Mindanao (UM) Wildcats, 115-111, saovertime sa nagpadayong 2019 Collegiate Sponsors League (CSL) Escandor Cup sa Almendras Gym Davao City Recreation Center, Dominggo, Nobyembre 10.

Misutoy ang Mats uban sa paningkamot nila Dioneil Lavente ug Juanito Ybañez.

Si Lavente mipuntos og 18 uban ang, 4 rebounds samtang si Ybañez mikamada og 26 ka puntos, 11 ka rebounds, 7 assists ug 4 steals.

Si Lavente, sa post-game video interview sa Escandor Cup Facebook page, nagkanayon nga gisunod lamang nila ang sistema sa coach aron makabawi.

Si Ybañez, "Pasalamat ko sa team kay nagmotivate nga don't give up, nakahabol jud mi."

Ang Mats, miangkon sa duha ka daug human ang tulo ka duwa, samtang ang UM Main nahagsa sa 3-1.

Ang kompetisyon magsilbing qualifying sa Philippine Collegiate Champions League (PCCL) Mindanao Finals.

Sa laing duwa, ang HCDC Crusaders mipildi sa San Pedro College (SPC), 71-65, diin si Ric Ruales miiskor og 16 aron pangunahan ang iyang tim sa kadaugan.

Siya sab miangkon sa 10 rebounds, 1 ka steal, 1 ka assist ug block.

Ang Brokenshire College Green Dragons, sa ilang bahin, mipayukbo sa Asian International School of Aeronautics and Technology (Aisat), 127-59.

Si Robert Dimas mipundo og 21 ka puntos aron aswaton sa kadaugan ang Brokenshire sa bracket B.

Duna sab siyay 6 rebounds, 4 assists, 5 steals ug 2 blocks.

Ang liga gipresenta sa Samahang Basketbol ng Pilipinas (SBP) 11 regional director Glenn Escandor. (MLSA)