NIANGKON og titulo ang duha ka taga dakbayan sa Davao sa bag-ohay pa lang natapos nga 2019 National Age-Group Chess Championships Mindanao Leg sa M'lang, North Cotabato.

Sila si James Catayas ug Caerel Shane Mantilla nagpildi sa ilang tagsa-tagsa ka mga kontra sa tulo ka adlaw nga kompetisyon nga gipasiugdahan sa National Chess Federation of the Philippines (NCFP) ubos sa ilang presidente nga nga si Cong. Prospero Pichay, Jr. sa pagkig-abag kang M'lang Mayor Russel Abonado ug Vice Mayor Joselito Piñol.

Nakaani ang second-seeded nga si Catayas og singko puntos sa unom ka hugna nga boys under 12 nga tigi samtang si woman Fide master (FM) Antonella Berthe Racasa sa Marikina City ug Allan Gabriel Hilario sa Bulacan niiskor og managsama nga 4.5 puntos aron nga mahiluna sa ikaduha ug ikatulong puwesto, sa maong han-ay.

Si Catayas wa makatilaw og pildi kon diin gidaug ang upat ka mga tigi ug nagtabla sa laing duha. Iyang gipildi ang taga Cagayan de Oro City nga si Pete Xander Ganzon, Chaelton Sumaylo sa Davao City, Allan Gabriel Hilario sa Bulacan ug Wayne Ruiz sa Laguna ug nagtabla og puntos uban kang Racasa ug Khent Lourence Canas.

Sa bahin ni Mantilla, siya ang nihari sa girls under 12 pinaagi sa pagbuntog sa kababayan niyang taga Toril nga four-pointer nga si Ruth Literatus pinaagi sa pagdaug sa tiebreaks human ang lima ka hugna.

Ang naulahi nahiluna sa runner-up samtang si Janiella Maeren Garcia sa Cagayan de Oro City, kinsa dunay 3.5 puntos, maoy ikatulo.

Gibuntog sa top-seeded Dabawenya ang taga M'lang nga si Jamaica Aniscal, Sara Dalagan sa Tagoloan ug Garcia.

Nakatabla sab si Mantilla sa taga Tagum City nga si Marj Manguilimotan ug Alliah Faith Bansiloy sa Cagayan de Oro City.

Gisulti ni NCFP regional director James Infiesto kagahapon nga ang unang tulo ka magdudula sa matag kategoriya moabante ngadto sa grand finals sa Abril 4 hangtud 9 sa Zambales.

Ang lain pang mga Dabawenyo nga nakakuwalipika mao sila Monica Lorraine Togonon, Hadassah Literatus, Ruth Literatus, Irish Yngayo, Queen Peralta ug Roselle Vienne Guevarra.