MIABOT sa Davao City si Aiba Women's World Boxing Championships gold medalist Nesthy Alcayde Petecio Dominggo, Oktubre 20, 2019.

Pasado alas otso sa buntag, miabot ang atleta nga gitakdang makig-uban sa iyang pamilya sa Barangay Tuban, Sta. Cruz sa Davao del Sur.

Matud ni Petecio nga excited siya sa iyang pagbakasyon.

Inay nga mo-istar og hotel sa Davao City diin siya may courtesy visit kang Mayor Sara Duterte-Carpio ug Sangguniang Panlungsod (SP) members karong semanahan, mas gipili sa 27-anyos nga world champion nga didto mag-istar sa Tuban uban ang iyang ginikanan.

"Usahay lang man gud nako sila makauban," niya pa.

Si National Women's Boxing team coach Nolito “Boy” Velasco nagsulti nga si Petecio usa ka semanang magbakasyon apan padayon gihapon ang pagbansay.

Si Association of Boxing Alliances in the Philippines (Abap) executive director Ed Picson, nagdugang nga si Petecio ug ubang parte sa 30th Southeast Asian (SEA) Games-bound National Boxing team magbansay sa Australia una sa Nobyembre 30 ngadto Disyembre 11 nga meet.

“Depende kon kanus-a ma-approve ilahang mga visa. Target namo is October 27 to November 16.”

Naangkon ni Petecio ang Aiba Women's World Boxing Championships 2019 gold human gipildi si Liudmila Vorontsove sa Russia sa women's 57-kilogram finals.

Siya midawat og P3 million nga cash incentives ug P1 million matag usa gikan nila Presidente Rodrigo R. Duterte, Philippine Sports Commission ug MVP Sports Foundation of Manny V. Pangilinan.