BUKAS si Nonito Donaire Jr. nga makig-rematch sa bag-ong super WBA/IBF bantamwweight champion Naoya Inoue kon mao man gani kini ang anaa sa alimpatakan ni Ringstar Sports CEO Richard Schaefer.

Si Inoue gilaraw nga adunay duha ka away sunod tuig -- usa sa US ug usa sa Japan -- ubos sa Top Rank Promotion.

"If a rematch is on the table, let's do it again," matod ni Donaire sa interview sa beteranong boxing analyst ug giangaan nga walking dictionary sa Philippine Sports nga si Quinito Henson.

Sa ilang away niadtong Huwebes, si Inoue midaog batok ni Donaire pinaagi sa 12-round nga unanimous decision atubangan sa 20,000 ka fans sulod sa Saitama Super Arena didto sa Japan.

"A lot of people are asking why not do a rematch? If it's something the Inoue camp wants, it would be my honor to accept in a polite way. I think it would be a heckuva fight, the second time around," matud ni Donaire.

Gikan sa Japan, si Donaire gikatakdang mobakasyon sa Boracay ug mobisita sa iyang lungsod didto sa Bohol.

Human niini, mopaingon dayon siya sa Manila diin magselebrar sa iyang ika-37 nga kasumaran sa adlawng natawhan.

Hinuon, giangkon ni Donaire nga makiangayon ra gyud kaayo ang decision sa judges.

Iyang gipadayag nga aron pagsiguro sa iyang panglawas, dali dayon siya nga nagpa-check-up sa haduol nga tambalanan human sa ilang away. Apil na niini ang CT-Scan.

Dugang ni Donaire nga sikit kaayo ang away ug ang knockdown sa ika-11 nga round maoy nakahatag og dakong deperensiya batok kaniya.