SI AIBA Women’s World champion Nesthy Alcayde Petecio miangkon sa unang kadaugan kontra Krismi Ayoma Dulanjani Lankapurayalage sa Sri Lanka sa women’s featherweight class sa Asian & Oceania Olympic Boxing Qualifying Event sa Amman, Jordan.

Ang 27-anyos nga si Petecio mipaundang ni Lankapurayalage, 5-0, sa women’s featherweight 54-57 kilograms clash ug nakuha ang pagtando sa lima ka hurado.

Sila Roberto Fernando Servide sa Argentina ug Mikhail Shashkov sa Russia mihatag sa iskor nga 30-27, samtang si Hernandez Romero sa Spain ug Radoslav Simon sa Slovakia mitala og 30-26, ug Dmytro Lazarev sa Ukraine mihatag sa 30-24, tanan pabor sa kanhi boksidor sa Davao City.

Ang kusog nga kumo ni Petecio wa kapasugakod sa Sri Lanka boxer nga una ng mipildi sa Indonesia’s Ratu Silpalau, aron maplastar ang bugno tali Japan’s two-time AIBA Women’s Youth World Boxing Championships bronze medallist Sena Irie sa sunod round.

Si Philippines women boxing coach Nolito Velasco, sa Facebook interview sa SunStar Davao, Marso 5, nagsulti, “Maganda ang laro nya kagabi. Panalo sya kontra Sri Lanka, next Japan. Pag manalo sya, pasok na sa Olympics.”

Si Petecio, gikan Barangay Tuban sa Sta. Cruz sa Davao del Sur, midaug sa una niyang gold medal sa 30th Southeast Asian (SEA) Games dihang ang nasud maoy host niini, Nobyembre 28 ngadto Disyembre 11, 2019 human ang malampuson niyang performance sa 2019 Aiba Women’s World Boxing Championships Ulan-Ude, Russia.