ANG Davao City Private Schools Athletic Association (Prisaa) Unit Meet 2019, nga qualifying sa Davao City Athletic Association (DCAA) Meet 2019, magsilbi sab nga city elimination sa Regional Prisaa Meet 2019.

Si Prisaa Davao City president Ma. Lita Montalban, nga pangulo sab sa Prisaa 11, nagyagyag niini atol sa Davao Sportswriters Association (DSA) Forum sa The Annex sa SM City Davao, Huwebes, Septyembre 19.

“Giisa na namo ni to minimize costs pero dili tanang events sa DepEd-run nga DCAA Meet apil sa Prisaa unit meet, wala pa miy gymnastics karon,” suma niya.

Mga bag-ong isports nga apil sa sportsfest alang elementary ug secondary student athletes mao ang billiards ug 3x3.

Duna nay advance games nga himuon sa pipila ka tims karong Septyembre 24 samtang ang opening rites sa Rizal Memorial Colleges (RMC) Petro Gazz Arena karong Septyembre 27.

Samtang ang semifinals karong Septyembre 28 ug championship games sa Septyembre 29.

Duna say cheering competition sa elementary division atol sa opening ceremony.

Sa kasamtangan, ang Prisaa may 18 ka miyembro uban ang Lyceum of the Philippines University (LPU) ug Malayan Colleges Mindanao (MCM) isip bag-ong mga partisipante.

Ubang miyembro mao ang Agro-Industrial Foundation College of the Philippines (AIFCP), Apo Learning Village, Emar Human and Environmental College, Davao Doctors College, Jose Maria College, Independent Liberty Baptist Academy, Mindanao Christian Foundation College and Seminary, University of Mindanao (UM) Main, Southern Philippines Baptist Theological Seminary, The Abbas Orchard School, Holy Spirit Academy of Calinan, St. Francis Xavier, St. Francis College, UM Ilang, Good Soil Academy, RMC ug AMA Computer College.