SI PHILIPPINE women's tennis No. 6 Shaira Hope Rivera, nga kanhi nagduwa sa Davao City samtang nagtungha sa Sta. Ana National High School, nangandam na alang sa iyang pag-arangkada sa Southeast Asian (SEA) Games pinaagi sa pag-apil sa KL Open karong semanaha.

Uban niya si top-ranked Marian Jade Capadocia, AJ Lin ug men's No. 2 Jeson Patrombon sa ilang biyahe padung Manila, Nobyembre 11.

Si Rivera, nga gikan sa Compostela Valley, mihulip kang women's third-ranked Anna Clarice Patrimonio alang sa KL Open tungod ang uwahi nagpaalim pa sa iyang injury.

Ang 20 anyos nga si Rivera, nga kasamtangang second year AB Literature English varsity student sa Ateneo de Manila University, namahayag, "Sobrang saya po kasi dream ko po mag Sea Games and now maglalaro na po ako at ma represent ko po yung country natin."

Niya, di pa sab siya sigurado kung unsa nga kategoriya ang sudlan sa biennial meet.

"Okay naman training namin po last August and September sa Amsterdam po kami nag training tapos balik dito sali ng tournaments at alis uli kami sa mga tournament sa ibang bansa po," dugang niya.

Nagabansay siya sud sa duha ka oras sa buntag ug tulo ka oras sa hapon una siya mopadayon sa iyang training sa gym.

"Hindi ko pa po alam yung feeling kapag naglaro na talaga ng Sea Games pero I think mas nakakapressure na dito pa sa Philippines po."

Apan siya malaumon nga mahatag pa ang iyang "best" sa Games ilabi na nga padayon siyang ginadasig sa iyang kaubanan sa pagbansay.

"Nakakakaba po talaga lalo na first time ko," niya.

Usa siya sa angay atangan sa mga atleta sa Davao region athletes nga motigi sa 30th SEA Games karong Nobyembre 30 ngadto Disyembre 11.