ANG Toril-based Fide master (FM) Austin Jacob Literatus sa Davao City maoy mikampeyon sa unang National Master Prospero Cruz Memorial Blitz Arena online chess tournament.

Si Literatus, nga UAAP National University (NU) chess varsity scholar, mibugha og 60 puntos sa 19 ka match sa kompetisyon nga giorganisa sa APM Mindanao Chessmates isip paghinumdum sa kanhi Dabawenyo nga chess player nga si Cruz nga nagsaulog sa iyang adlawn'ng natawhan, Abril 7.

Si Literatus (AJ_Literatus) mipakurat nila international master (IM) Michael Jako Concio (Michaeljako_concio) sa Cavite ug Mark Baldesimo (maekovian24) sa Agusan nga mitugpa sa ikaduha ug ikatulong pwesto.

Si Concio mipupo og 44 puntos, samtang si Baldesimo mikamada og 42 human sa 16 ka duwa.

Ang nag-unang tulo ka magduduwa midawat og GCash o load nga P250, P150 ug P100.

Si Literatus napildi lamang sa usa ka duwa tali Roullo Rolzon sa iyang fourth outing ug mi-split point kang Vic Ariate sa 18th match.

Apan gipildi niya ang laing 17 ka magduduwa, Spencer De Guzman, RJ Ian Carlo, Dear Heart, Rolzon, Noel dela Cruz, Mariko Zamora, Jay Anruel, Charles John Fiel, Hermie Cagatin, Romeo Larayos Jr., John Ray Batucan, Harison Maamo, Perkins Bayron, Johnnel Balquin, WFM Allaney Doroy, Concio, Raf23 ug Batucan.

Si Tournament organizer Ely Acas nagsulti nga ang kompetisyon gihugupan sa 286 ka magduduwa.