DAVAO CITY - Si Sammy Talaboc napabilin ang pamulso, hangtud sa uwahing round aron makuha ang titulo sa Metro Davao Bowlers Association, Inc. (Metba-Davao) Bowler of the Year 2019, niadtong Biyernes, Enero 10, 2020 sa SM Lanang Premier Bowling Center.
Si Talaboc, kinsa nanguna sa six-game eliminations pinaagi sa pagpaligid og 1,186 pins aron maangkon ang twice-to-beat advantage in the step-the-ladder finals, mipaligid ni William Galacio, 213-201, sa championship match.
Si Talaboc midawat og premyong P5,000 samtang ang runner-up nga si Galacio may P2,500.
Laing duha ka magduduwa, Vivienne Flores ug Rene Zabat mibulsa og P1,500 ug P1,000.
Sa eliminations, nagsunod ni Talaboc mao sila Flores (1,153 pins) sa ikaduha, Galacio (1,150 pins) sa ikatulo ug Zabat (1,103) sa ikaupat.
Sa step-the-ladder finals, si No. 3 Galacio mipildi sa No. 4 Zabat, 204-158, dayon si Galacio mipatikangkang ni Flores, 177-166, una napildi kang Talaboc.
Anaa sa 12 ka magduduwa ang nagtigi sa torneyo.