MOKABAT sa 237,000 ka turista, nga gilangkuban sa langyaw ug lokal, midagsa sa Montevista sa Compostela Valley sa nakalabay nga tuig alang sa Diwanag Festival.

Karon, malaumon ang lokal nga gobyerno sa dapit nga msa daghan pa ang moduaw sa ilang lugar subay sa ilang paglusad sa “Churches in the World” nga tema sa ilang Diwanag Festival 2018.

Si Montevista Municipal Mayor Eutropio Jayectin nagkanayon nga dakong kontribusyon ang social media sa kalampusan ug sa daghang ihap sa mga bisitang midugok sa ilang dapit.

“Nagpasalamat gyud ko sa social media kay tungod nila napakaylap sa kadaghanan ang atong Diwanag Festival,” suma niya atol sa press conference sa soft opening sa festival.

Si Elsa Cantrall, municipal tourism coordinator, nagdugang nga may nakita silang pagsaka sa ihap sa mga bisita sa Diwanay itandi niadtong 2016.

“In 2016, a little more than 20,000 visitors only, compared to last year's 237,000 tourists who visited our place for the Diwanag.”

Dugang ni Jayectin nga bisan og third class municipality ang Montevista apan maka-accomodate sila og bisita nga modugok alang sa festival, inubanan sa ayuda sa kasikbit lungsod ug munisipalidad.

“But we are still exerting more effort to accommodate them (visitors), and we will not rest in our effort to accommodate more.”