GAAN kaayo akong gibati ug wala nako naghunahuna og kabalaka sa milya-milya nga kalayo sa akong gibiyahe nga ako rang usa paadto sa Batad Rice Terraces.

Tuod man, wala ko gayud igsapayan ang akong nasinatiang pagkadelatar tungod sa mga nadaot nga dalan ug sakyanan kay ting-ulan niadtong panahona.

Ang naa sa akong hunahuna mao ang di matukib nga kalipay nga naabot sa maong dapit nga niadto sa libro ug sa telebisyon ko lang nakita.

Pagdung-aw nako sa dapit, way kabutangan sa akong gibating kalipay, ug bisan balikbalikan pa sa makadaghang higayon, di gayud makapuol.

Sa akong pagtamak sa Batad, bisan sa kakapoy nga gikinahanglan nimong baktason o i-trek ang tanang buot nimong adtoan, -- kalipay ug di malimtang kasinatian ang misanap sa akong handurawan niadtong Hunyo 29, 2018.

Ang Batad Rice Terraces nahimutang sa Batad, Banaue, Ifugao Province, Cordillera Administrative Region nga sikat sa iyang “amphitheater” nga porma ug stone-walled samtang ang Banaue Rice Terraces mud-walled nga namugna sa mahigugmaon ug puno sa inspirasyon nga mga kamot sa mga Ifugaonon, 2000 ka tuig na ang nakalabay.

Usa ka di malimtang adventure ang nagpaabot sa tanang buot moanhi ngari nga nahimong parte sa Unesco World Heritage Site dinhi sa atong nasud.

Sunod Dominggo, isaysay ko pa kaninyo ang “itinerary” paunsa maabot ngari.