PORMAL nga gibuksan ang Kadayawan Festival niadtong Agosto 10 pinaagi sa “Pag-Abli sa Kadayawan,” sa Magsaysay Park sa dakbayan sa Davao.

Ang aktibidad nagpakita sa abundang kultura sa siyudad, rekursos naturales, ug icons sa Davao.

Apan, luyo sa mga icons nga nasaksihan atol sa opening, daghan sab ang na-excite nga misud-ong sa nakadisplay nga cake nga nagpakita sa nagkadaiyang icons sa dakbayan.

Subay sa selebrasyon, nakigduyog ang grupo sa Mindanao Cake Decorating Society (MCDS) pinaagi sa paggama og cake diin nagpakita unsa katahum ang King of Festival nga Kadayawan.

Makita sa cake ang abundang flora, fauna ug nagkadaiyang kultura dinhi, gikan sa lumad, Kristiyano ug Muslim.

Makita ang mga icons sa davao sa desinyo sa cake: ang Philippine Eagle, Durian nga “King of Fruits,” lumad ug waling-waling nga gitawag sab nilang “Queen of Orchids.”

Ang piho ug detalyadong patterns nga mihulma sa cake naghulagway sab sa lain-laing kultura nga anaa sa dakbayan.

Kaabag sa grupo sa pagmugna sa bonggang cake ang Peotraco Sweetening Lives, Peotraco Sales, Cuppycakes ug BakeWorld Inc.

Ang MCDS usa ka non-profit nga organisasyon nga naghiusa sa mga bakers, nga nakapokus sa pagpromotar sa talento ug abilidad sa mga miyembro niini sa Mindanao.

++++++

Kung kamo dunay mga aktibidad nga buot ninyong ipamantala, ipadala lamang ang inyong PRs, imbitasyon sa rhonnie.superbalitadavao@gmail.com