LAHI ra gyud ang cacao sa Davao!

Tuod man subli na sab kining napamatud-an sa mga cacao farmers sa Davao region, human mihakot na sab og pasidungog ang Malagos Chocolates sa internasyunal nga kompetisyon bag-uhay lamang.

Unom ka international awards ang gihakot sa Malagos Chocolate from Davao City gikan sa International Chocolate Awards-Asia Pacific, sa Grand Crus, Kaohsiung, Taiwan, Septyembre 24.

Sa mensahe ni Rex Victor Puentespina sa Malagos Agri-Ventures Corporation nga nakuha sa Malagos Chocolate ang gold sa 65 porsyento Dark Chocolate; silver sa 85 porsyento Dark Chocolate (Bar Category); Malagos Rhum (Flavored Dark Chocolate Ganaches or Truffles Category); ug sa bag-ong produkto nilang Malagos 72 porsyento Dark Chocolate Ganache (Unflavoured Dark Chocolate Ganaches or Truffles Category), naka-bronse sab sila sa Malagos 65 porsyento Dark Chocolate (Bar Category); sa new product nilang Malagos Salted Caramel (Dark Chocolate Enrobed Caramels Category).

Tungod sa laing pag-ila, anaa nsa 24 ka international award ang nakuha sa kompanya.

Nauna na silang midaug og noybi ka international awards – lima ug upat gikan sa Academy of Chocolate niadtong Mayo ug Great Taste, Agosto.

Nasayran nga ang 2018 Asia-Pacific competition gihimo sa unang higayon isip independent competition sa Asia, diin mas midoble ang ihap sa partisipanteng misalmot nga miabot og 700 ka produkto gikan sa 16 ka nagkadaiyang nasud.

Nagsilbing hurado gikan pa sa USA, Europe, Taiwan, Hong Kong, ug miyembro sa international Grand Jury.