DI TIAW ang pagkatkat og punuan, labaw na gyud og mosubida ka og bukid, ilabi na og wala ka ma-anad.

Apan kining tanan taphaw lamang, kung ang imong tumong sa pagsaka sa kabukiran, di lamang aron i-enjoy ang nature, apan, manghatag sab og hinabang sa mga nanimuyo sa dapit.

Bag-uhay lang misubida kami sa Sitio Misahumey, Datu Salumay, Marilog District Davao city bitbit ang mga donasyon, sama sa school supplies, solar lamps, sanina ug uban pa.

Milanat sab og kapin duha ka oras ang pagbaktas namo padung sa komunidad gikan sa among jump off area.

Mas sayon unta kung wala mi nagbaguod sa mga dala, apan ang kahagu nahupay human makita ang ngisi sa mga tawong naghuwat kanimo ug excited sa pahalipay nga among bitbit.

Ang makita ang usa ka bata nga malipayong midawat sa iyang regalo, gigupitan, namili og mga used clothings, gitudluan sa proper hygience, usa ka kasinatian nga di kabayran ang kalipay nga nabati.

Tuod man ang pagtabang yawe sa pagpaambit og kalipay ug gugma ngadto sa uban.

Buot namong mopasalamat kang Ms. Jani, nagpaluyo sa Lakwatserang Negra Facebook page ug sa iyang tim.

Si Ms. Jani ug kaubanan anaa sa pag-organize og mga outreach programs ug tours.

Ang simple nilang paningkamot nagsilbi namong inspirasyon unsaon nga makapaambit sab og tim-os nga kalipay ngadto sa uban.