ANG pagtapos sa matam-is kaayo nga panag-uban sa gugma daw susama sa imong pagpaminaw sa nindot kaayo nga awit – mahuman ra gyod, ug magpabilin sa imong pandungog ug pagbati ang kanindot niini uban sa mga pulong nga bisan sa lubnganan pukawon ang imong kalag aron hisgutan ang inyong mga di malimtan nga kagahapon.

Di gyod ko mosupak kung dunay moingon nga 'walay forever' diha sa gugma, gumikan tinuod gayod kini, apan mintras kamo pa, na hala pahimusli ang panahon, kay kana mamahimong di na mobalik diha kanimo; mobalik man apan lahi na sab ang mga panghitabo, ug di na susama niadto.

Sa gugma, daghan kita og mahimo, diha sa mga imposible nga mga butang sa kinabuhi, nahimo kini tungod kay nagtuo kita nga ang gugma, makagagahum.

Kanako, daghan na kaayo og mga pinasahe nga gugma nga miagi sa akong kinabuhi, diin sa sinugdanan, naglisod ko sa pag-move on gumikan bag-uhay pa ako sa maong panghitabo, wa pako masayod unsaon pagtindog kung madagma.

Sa pagligad sa mga adlaw, nakat-on ko sa daghang mga butang, ang pag-ila sa kamatuoran nga kinahanglan dawaton ang mga takna luyo sa mga mapait nga panghitabo sa panagbulag.

Ning bag-o lang naingon nako sa kaugalingon nga nakaplagan naman seguro nako ang tawo nga mosabot sa akong pagbati – ang tawo nga daw ig-uban ko na sa tibuok kong kinabuhi.

Apan ang tanan, daw usa lamang ka damgo, ug nagbalik-balik sa akong pagtuo ang pulong nga 'walay forever', pagtuo nga makonsiderang mitabang kanako kung paunsa nga dali nga maka-move on.

Sa maong panghitabo, usa lamang ang akong ipasalamat kaniya, mao ang iyang paghigugma nga nagtudlo kanako sa daghang mga kamatuoran sa kinabuhi.

Malaumon ako, nga panggaon siya sa ilang sunod nga higala, panggaon siya nga molabaw pa sa akong pagpangga ngadto kaniya.

Unta di na lab-ason sa iyang kasingkasing ug hunahuna ang mga kagahapon, kung mapadpad man siya sa mga dapit diin hain kami niadto nag-uban. Papahuwayon una nako ning akong kasingkasing, lab-as pa kaayo ang mga samad sa natigayon namo nga panagbulag.

Sa akong mga suki nga tigpanubay, bisan giingong walay forever, ayaw kamo og pahuway sa paghigugma sa tawo nga miabot sa inyong kinabuhi, padayona sila sa kinasingkasing gayod ug hatagi sila sa tumang kagawasan kung moabot ang panahon nga inyong nailhan sa matag kaugalingon ang pulong nga walay mohangtud.

Hunahunaa uban sa matam-ison nga pahiyom ang ilang di malimtan nga karakter sa inyong panag-uban nga nahimong kabahin sa atong mga matam-is nga panid sa istorya sa gugma.