DABAWENYO ka ba? Andam na ba ang imong DQR code aron gawasnon nga maka-biyahe, mamalengke, muadto sa mga mall ug mga transaksyon sa buhatan sa gobyerno sa dakbayan sa Davao? Kung nakasulay kana pag-access sa cellpone aron mokuhag DQR code niagi kaba sa mga kalisud?

Sa Nobyembre 7, 2020, ipatuman na kuno, mandatory sa dakbayan sa Davao ang paggamit sa DQR code sa tanang patigayon sa dakbayan.

Daghan ang mi-angal ug naglagot, daghan ang nagbilar aron paabuton nga makasulod sa web page sa SafeDavaoqr.davaoct.com kay buot mosunod sa patakaran sa Local Government Unit (LGU) apan nasanta sa pag-log sa computer, cellpone ug uban pang kahimanan.

Daghan ang nagkanayon nga dili pa andam ang mga kahimanan kay maglisud pagdawat ang linya sa 1.8 ka million nga populasyon sa Davao City nga naghuot sa pag-file aron mokuhag DQR code.

Daghan ang nakapangutana, gihunahuna ba sa mga adviser ni Mayor Inday Sara Duterte ang mga lakang ug kahagip-ot sa panahon nga gihatag sa katawhan?

Dili ko maulaw muangkon nga supporter ko ni Mayor Inday ug andam mo suporta bisan sa umaabot niyang kandidatura kon magpapili siya pagka Presidente sa umaabot nga eleksyon, apan sa isyu nga nakayagaw sa katawhan, motabang ta pagpasibaw sa pagbati ug yangungo sa katawhan tungod dili ta gusto nga mosimang sila sa dalan tungod nadisgusto sa kagamhanan.

Ang pasidaan nga nagdala og hulga nga dunay silot kon dili makatuman sa gitakda nga petsa pagkuha sa DQR Code, makahagit sa katawhan ug manimalos gamit ang ilang mga balota inig abot sa eleksyon.

Dili sab maayo nga di motuman ang katawhan apan naghambin og kayugot sa ilang kasingkasing tungod walay gugma apan napugos lang.

Dili tukma ang panahon nga pugson ug hadlukon ang katawhan kay nagsingabot na ang Pasko. Bisan nia ta sa pandemya, unta mabati man lang sa katawhan ang gugma kay daghan ang nag-alburoto ang hunahuna tungod sa krisis nga dala sa Covid-19.

Kung duna kay sakit sa kasingkasing, basin atakihon ka tungod sa kalagot sa kadaghang higayon nga ma palso sa imong pag-file sa DQR Code labi na nga nag-apas ka sa panahon nga sa Nobyembre 7, 2020, duna ka na niini.

Gamay nga pagsabot ang hangyo sa katawhan nga hatagan sila og lugway kay dili tanan dunay kahimanan aron maka file ug maka kuha sa DQR.

Mga Dabawenyo, dugang pailub ang atong gikinahanglan. Atong sabton nga ang gobyerno nagasulay sa tanang pamaagi aron pugngan ang pagkuyanap sa virus.

Halos tanang LGU buot magpatuman sa QR Code aron mapasayon ang contact tracing tungod sa pagsutoy sa kaso sa Covid-19. Atong hunahunaon nga viral kaayo ang kamatay karon, Covid ang hinungdan.

Bisan muigham kalang, lingion ka ug tanang mata motutok kanimo ug maghunahuna nga mananakod kang dako, busa amping ug pailub lang.