ATONG hisgutan karon ang pipila ka pangutana sa among suking tigpaminaw sa radyo labot sa nahitabo sa iyang tulo ka mga manok nga gikumpiska sa checkpoint didto sa Panabo City.

Ako kining nasayran dihang mitawag si Sir Bert nga taga Toril ning siyudad sa Davao niadtong Lunes sa gabii. Suma niya, tigpaminaw siya namo sa Aksyon Radyo mao nga nakakuha siya sa akong cellphone number.

Sa among pagsulitahanay, iyang gipahibalo nga niuli iyang asawa kagahapon didto sa Cateel, Davao Oriental aron moatiman sa importanteng butang. Aron makadala og sinugatan sa ilang mga kabanay, nagpadala siya og tulo ka buhing manok sa iyang asawa.

Ang kahinam sa ilang kabanay nga makahigop og lamiang sabaw sa manok gikan sa siyudad napaltos tungod kay gikompisa sa checkpoint sa Panabo City. Sanglit gikumpiska sa pulis ang dalang manok, daling gipahibalo sa asawa iyang banang si Bert. Ug kay gisayangan lagi, nagpakisusi siya nako kung mabalik pa ba ilang manok.

Aron masayran kung unsay polisiya, akong gipangutana ang akong suod nga higala ug classmate, Samuel Anay, kinsa maoy Assistant Agriculturist sa Panabo City, pinaagi sa text.

Suma pa niya, "Wala pa gi-lift ang regional quarantine sa chicken, dol. So, need mag-comply sa Bureau of Animal Industry (BAI) og mga requirements to ship chicken crossing from one region to another. Ang uban gani nga province mangita pod og shipping permit. FYI. Regards!"

Ako sab dayon gisundan og laing pangutana: "Usaon sa pulis ang confiscated nga mga manok, dol?" Tubag sab niya nga dala komedya: "I-turnover sa City Vet Office. Kung walay mo-follow up, paingon sa police kitchen office."

Human nako nadawat ang iyang tubag, hilabihan nakong katawa. Bitaw, alang sa inyong kasayuran, basta magkauban mi ning akong classmate -- sige ra gyud mi og pangatawa. Bitaw, ako ning gihisgutan dinhi sa atong column tungod kay gusto nako ipaabot sa mga nagbantay sa checkpoints nga ipasabot og maayo sa mga tawo kung unsa ang mga balaod nga inyong gipatuman.

Kay di man gyud malikayan nga matingala ang tawo nganong gipabilin sa pulis ang manok nga unta ilang trabaho sa checkpoint mao man ang pagseguro nga nituman ang mga tawo sa health protocols sa Covid-19.

Sa paghatag og diyutay nga higayon nga mapasabot sa tawo ang ilang kalapasan ug proseso, labing seguro makasabot gyud sila.

Usahay man gud, base sa akong naobserbahan, busy kaayo ang pipila sa atong kapulisan sa uban nga mga butang, pasagdan lang nila ang police auxiliary nga di suhito sa mga balaod.