LISUD dawaton ang kapildihan, apan mao kini ang kamatuoran nga angay nga atubangon sa mga kandidato nga wala palara sa bugnong lugaynon niadtong Mayo 13.

Sama pananglit sa mga kandidato sa oposisyon nga Otso Diretso nga wala makasulod sa Magic 12 sa pagka-senador.

Kini maoy hinungdan nga pag Martes, gipahibawo ni Senador Kiko Pangilinan nga moluwat siya sa iyang katungdanan isip presidente sa Liberal Party nga samang higayon maoy campaign manager.

Moepekto ang pagluwat ni Pangilinan sugod sa Hunyo 30 ning kasamtangang tuig.

Hinuon, giangkon sa senador nga iyang responsabilidad nga wala nilusot ang ilang mga kandidato ug tulubagon niya kini isip campaign manager.

Giklaro nga “command responsibility” ang hinungdan sa iyang pagluwat isip opisyal sa partidong LP.

“As campaign manager for the Otso Diretso slate, I was unable to ensure our victory in the elections & I assume full responsibility for the outcome and hold myself primarily accountable for this defeat & have tendered my resignation as president of the LP effective June 30, 2019,” pagklaro ni Pangilinan.

Apan nagpasabot lang kini nga gidawat na niya ang gidangatan sa iyang mga kauban sa oposisyon.

Hinuon mag-agad pa kini kon aprobahan sa chairperson sa LP nga si Vice President Leni Robredo ang iyang resignation.

Lisud man tuod dawaton ang kapildihan, apan kinahanglan aron nga dali na lang ang pag-move on.

Ingon man gyud niini ang eleksiyon, dunay modaug ug duna say mapildi.