SAMTANG nagdagan ang katuigan, nunot sa gihingusgang kampanya sa kagamhanan batok sa pabuto ug pagseguro sa kadagkuan sa PNP nga ang ilang mga ginsakpan di makapabuto, nagkaminos ang gidaghanon sa nangabuthan.

Nag-anam usab og kawala ang mga kaso sa nangaigo sa stray bullet. Di sama sa katuigan nga lugak pa ang kagamhanan, tagsa rang Pasko ug Bag-ong Tuig nga way mangaigo sa saag nga bala.

Taas usab ang mga kaso sa nangabuthan sa firecrackers.

Gawas nga gihugtan ang kampanya sa paggamit sa pabuto, giseryuso usab sa kagamhanan ang pagdili sa pagbaligya bisan asa niini.

Kugihan ang mga pulis sa paglibot sa kadalanan aron pagsanta sa mga mamaligyaay og pabuto.

Di lang kay ang Department of Health (DOH) ug kapulisan ang aktibo, kon di apil na ang Bureau of Fire Protection (BFP). Nikampanya sila kay sa nangaging katuigan, busy sila sa pagtubag sa mga alarma sa sunog tungod sa mga pabuto ug series lights.

Ang epektibong kampanya makab-ot diay basta magtinabangay ang mga ahensiya sa kagamhanan ug katawhan.

Way butang nga di makab-ot basta magkahiusa ang tanan.

Hinaut pa unta nga mominos pa ang gidaghanon sa mangabuthan matag tuig.

Hangtud nga moabot nga wa nay bisan usa nga maangol.

Mahimo baya nga sugaton ang Pasko ug Bagong Tuig nga way pabuto kay naay torotot nga luwas gamiton.