WALA gyo'y nahimo ang mga residente sa Barangay 23-C, Isla Verde sa Poblacion District, Davao City human nakahukom ang lokal nga kagamhanan sa Davao City nga ipaubos ang maong barangay sa "hard lockdown."

Sa gipatumang hard lockdown, wala nay nagmagahi -- ang tanan, nagpuyo sa ilang mga balay aron di na mokuyanap sa maong dapit ang coronavirus disease (Covid-19), kay lagi ang maong barangay ang daghan og kaso sa virus.

Una niini, miangkon kang Davao City Mayor Sara Duterte-Carpio si Barangay 23-C Kapitan Alimoden "Wating" Usman nga gahi gyod og ulo ang pipila niya ka mga residente.

Mag-face mask lang daw kuno ang pipila kung sitahon na sila sa otoridad, kadtong wala pa'y hard lockdown, buot-ingnon wa nangahadlok sa virus -- gahi gyod tinuod og ulo.

"Daghan ni og basehan, mainly ang cases, batasan sa mga tawo and kakayahan sa barangay officials. All those factors nag-contribute sa decision na ibutang siya under hard lockdown," ingon ni Duterte-Carpio.

Sumpay niini, "Giistorya na nato ang barangay captain ani kung what is wrong? Miangkon gyod ang barangay kapitan nga maglisod sila."

Karon kay nahitabo naman ang pag-hard lockdown, naa pa ba'y nagginahi og ulo? Seguro wala na, naamgo na ang mga residente nga kinahanglan motuman gyod sa gobyerno, gumikan kay kaluwasan kini sa tanan, di lang nila.

Leksyon kini sa ubang barangay sa Davao City nga duna sab mga kaso sa Covid, unta magmatngon ta, di magginahi og ulo aron di mapa-lockdown ang gipuy-ang barangay.