PIPILA ka adlaw nalang una ang Septyembre 21, 2020 ang adlaw nga gihulat sa daghang managayay sa Davao City, kay mawagtang na ang 24-oras nga liquor ban, ngari.

Gihimo ang 24 oras nga liquor ban gumikan sa pandemya, apan hinumdoman sa makadaghang higayon, naa gihapon ang liquor ban ordinance sa Dakbayan, alas 12 sa tungang gabii padung alas 5 sa buntag, way tagay.

Kana nga oras, niadto pa naanad na ang mga Dabawenyo, butang nga nianang mga oras walay mosupak.

Sa pagwagtang sa 24 oras nga liquor ban, daghan ang maguol nga mga mapahimuslanong negusyante, gikan sa ilang kawat-kawat nga pagbaligya og beer sa kantidad nga P150 panahon sa pagpatuman sa 24-oras nga ban.

Dayag man gyod nga mobalik ang kanhi presyo niini sa wala pay pandemic, mao nang di gyod diay maghangtud ang butang nga dunay pagpasulabi.

Sa pagwagtang sa 24 oras nga ban, unta di gyud pod magpatuyang sa pagtagay ang mga umiinom, kay basin magmaoy; hinunoa nga kung maka-inom, ibutang sa tiyan, dili sa utok aron walay samok.