ANGAYAN nang hatagan og pagtutok ang pagdaghan sa kaso sa human immunodeficiency virus (HIV) sa Pilipinas.

Sumala sa Department of Health nga ang Pilipinas maoy dunay pinakataas nga pagdaghan sa kaso sa Asia-Pacific region sukad pa niatong 2010 hangtud 2016.

Tungod niini, gilagdaan ni Pangulong Rodrigo Roa Duterte ang Philippine HIV and Aids Policy Act of 2018 aron nga mahimo nang hingpit nga balaod nga nahaum sa panahon ug nagtumong sa pagtabang sa pagpakubos sa “stigma” sa mga duna niini nga balatian.

Sumala pa ni Presidential Spokesman Salvador Panelo, ang bag-ong balaod naghatag sa mga establisemento og mga polisiya ug programa aron pagpugong sa pagkatap sa nahisgutang epidemya ug sa samang higayon, mohatud og saktong serbisyong pagpanambal, pag-atiman ug suporta niadtong mga kaigsuonan nga nagbalatian niini subay sa mga estratihiya ug diskarte nga nahaum sa mga nag-unang prinsipyo sa tawhanong katungod, gender equality ug makahuloganon nga pagsalmot sa komunidad.

Klaro nga napanday ang maong balaod aron tabangan nato ang atong mga kaigsuonan nga naa sa maong kahimtang ug atimanon sila nga di lahi kanato kay nabase kini sa pagtampo sa daghang mga stakeholders aron tagaan og pagtagad ang maong suliran.

Angayan silang tabangan sa ilang sitwasiyon ug ang pagtabang di na langayon kay nagkinahanglan na sila niini base sa balaod nga bag-o lang nahingpit.