KINAHANGLAN nga mag-igmat ning mga residente nga anaa sa mga barangay sa Agdao District, Davao City kay hayan sila ang mosunod nga ipaubos sa hard lockdown, ugaling mosamot og sutoy ang kaso sa coronavirus disease (Covid-19) sa maong mga dapit.

Ang Agdao District gilangkuban sa mga barangay sa Agdao Proper, Tomas Monteverde Sr., Leon Garcia, San Antonio, Paciano Bangoy, Wilfredo Aquino, Gov. Vicente Duterte, Centro, Ubalde, R. Castillo, ug Lapu-Lapu.

Si Davao City Mayor Sara Duterte-Carpio nauna nang nagbutyag nga nagpadayon ang ilang diskusyon kung ipaubos ba sa hard lockdown ang Agdao o dili.

Kini ang nasulti sa mayor dihang anaa ang pagtaas sa kaso sa Covid-19 sa Agdao, apan wala kini nagtumbok unsang barangaya.

"Increasing ang cases sa Agdao pero so far, murag maagapan man. Pero ongoing ang discussion if i-hard lockdown ba didto," ingon ni Duterte-Carpio sa radio program niini sa 87.5 FM dcDR.

Aw, unsa pama'y dugayan, siyempre moaksyon dayon ang kagamhanang lokal kay usa sa mga tumong niini ning pandemya ang panalipdan ang katawhan batok Covid-19.

Lamang, kulba gyud, kay bisan ang mga trabahante di man gyod ka trabaho, mudo -- pait gyod labi na og way nahut, lisod baya kaayo magsalig sa rasyon sa gobyerno kay kini limitado.

Ang labing himuon sa katawhan aron di ma lockdown ang ilang barangay, ang pag-igmat ug mosunod gayod sa mga gipatuman sa gobyerno.