PERTE ka trapik ang Davao City sa unang pagpatuman sa pagbalik sa paggamit sa Food and Medicine (FM) pass.

Trapik, gumikan kay, giusa-usa gyod sa mga pulis ang pagsubay kung duna ba'y FM pass ang mga pasahero o motorista o kung misunod ba sila sa husto nga number coding.

Nagyawyaw ang mga mopadung sa trabaho, nanga-late, kay halos mag usa ka oras ug tunga una paka makalabang sa checkpoint. Diri panaglit sa Quimpo Boulevard ug didto sa Mintal, nabati ang tumang trapik nga hangtud sa downtown gaaginod ang mga sakyanan.

Siyempre, sa bahin sa otoridad, mo-adjust pa sila, sama sa unang pagpatuman niining FM pass, nagguot man to sa trapik, kadugayan, nahan-ay ra man.

Maayo na lang gani kay gitanggal na nila ang mga lungon nga gipangbabag sa kalsada, kay kung wala pa, samot ang sitwasyon.

Moagwanta lang sa unta ang mga motorista kay kining gihimo sa otoridad kabahin man kini sa padayong bugno sa di makita mga kalaban. Ang pasensya sa matag usa ang labing gikinahanglan aron matunhay ang dagan sa kinabuhi luyo niining pandemya.

Kooperasyon ug pasensya naa unta kini kanunay sa hunahuna ug kasingkasing sa matag gawas sa balay subay sa sugo sa panginahanglan.