BISAN tuod og nagdala og kaayohan ang Bagyong Chedeng sa mga lugar nga giigo og hulaw dinhi sa Davao Region, apan naa gihapon ang hulga sa kinabuhi ug propedad busa kinahanglan nga mag-amping ang tanan.

Gilauman nga moigo sa yuta ang bagyo karong adlawa dinhi sa rehiyon.

Matud ni Philippine Atmospheric Geophysical and Astronomical Services Administration (Pagasa) forecaster Benison Estareja nga human moigo sa yuta ang bagyo, mohinay ug mahimo na lang nga low pressure area (LPA).

Apan di gihapon kita mokompiyansa kay magdala kini og mga pag-ulan, ilabi na gyud kadtong naa sa mga ubos nga bahin.

Base sa taho sa Pagasa nilihok kini pakasadpan sa gikusgon nga 20 kph nga nagbaton og gikusgon sa hangin nga 45 kph ug dunay bugso nga 60 kph.

Mga lugar nga naa sa signal number one mao ang Davao Oriental, Compostela Valley, Davao del Sur, Davao City, General Santos City, Davao Occidental, habagatang bahin sa Davao del Norte uban ang Island Garden City of Samal, sidlakang bahin sa North Cotabato, sidlakang bahin sa South Cotabato, ug sidlakang bahin sa Sarangani.

Kini maoy hinungdan nga mga lokal nga kagamhanan sa nahisgutang mga lugar, nagdeklara na og suspensiyon sa tanang level sa klase kagahapon pa isip pagpangandam ning adlawa.

Mangamuyo kita sa Ginoo nga iiway kita sa tanang mga katalagman ning panahona samtang motadlas ang bagyo dinhi sa rehiyon.