MAS mahimo nang mabulukon ug alegre ang palibot kung magsugod na ang pangampanya sa mga lokal nga kandidato alang sa Mayo 13 nga midterm elections.

Gitakda nga sugdan ang kampanya sa mga lokal nga kandidato karong Marso 29, adlaw'ng Biyernes.

Niadtong Pebrero 12, nagsugod ang kampanya alang sa mga kandidato nga nanagan sa pagka-senador ug sa partylist.

Ning higayona, gilauman nga mas modaghan pa ang mga campaign materials nga mokatag, ilabi na sa mga campaign poster areas nga gipahimutang sa Commission on Elections (Comelec).

Gawas sa mga campaign materials, mga kandidato gilauman sab nga mogamit na sa social media sa ilang pangampanya. Kay gawas nga mas high tech kini nga paagi, mas halapad ang coverage aron makaawhag nga botohan sila.

Ang problema lang kay medyo di klaro ang balaod sa Comelec bahin sa paggamit sa short message service o SMS.

Matud pa nga posibleng malapas ang anti-spamming regulations sa Department of Information and Communications Technology (DICT) kung padayon ang paggamit sa mga kandidato sa mobile number.

Kini subay sab sa mga reklamo gikan sa pipila ka subscribers sa pagbaha sa SMS nga mga kandidato nag-awhag ngadto sa mga botante nga iboto sa Mayo nga eleksiyon.

Apan ang nakalibog kay walay karong balaod ang Comelec niini gumikan kay alang kanila di matud pa gidili ang paggamit sa SMS sa pagpangampanya.

Mas maayo gyud unta kon dunay klarong sumbanan ang komisyon sa paggamit sa SMS aron nga maoy sundon sa mga kandidato aron nga way malapas nga katungod sa mga subscribers.