NAPANGITAAN na ba kaha sa mga lokal nga kagamhanan sa mga dapit sa North Cotabato ug Davao del Sur nga naigo sa linog kung asa ipahimutang ang mga bakwit?

Kahinumdoman nga Nobyembre 11 lamang unta taman ang mga bakwit sa ilang gihimong mga evacuation centers sa mga tunghaan kay gamiton na sab kini sa mga estudyante.

Dili baya sab puwede nga diha nalang na sila sa taas nga panahon gumikan makabalda sab kini sa pagpahigayon sa klase sa paghuman sa school year 2019-2020.

“Makig-koordinar kita sa local government ngari sa Makilala ug sa bisan asang dapit sa North Cotabato diin asa naa sila sa mga tunghaan ang atong mga victims nga mangita kita og area aron maoy himuon natong temporary shelter sa atong mga bakwit, kay gamiton man sab ni ang eskuwelahan,” ingon ni Bonifacio V. Selma Jr., assistant Regional Director for Operations sa Department of Social Welfare and Development (DSWD) Soccsksargen.

Ang bugtong nasayud kung asa ipahimutang kining mga bakwit mao kining mga mayor sa matag lalawigan diin asa giigo sa 6.6 magnitude nga linog, Oktubre 29.

Unta dili magkaang-kaang ang mga mayor sa pagpangita og maayong lugar nga temporaryong kahiklingan sa mga bakwit. Gawas niini, himuon gyud dayon ang plano alang sa pabalay sa mga nalinogan, -- pabalay nga anaa sa luwas nga lugar aron unya panahon sa kalamidad dili kaayo dako ang madanyos.

Magtinabangay sa pagplano asa sila ipahimutang, aron makabangon dayon ang DavSur ug NorCot, di unya na, di ugma na, kun di, karon na!