DUGAY na sab nga mga katuigan sukad sa ulahing eleksyon diin nalakip ang Sangguniang Kabataan (SK), ug sa pagbalik niini karong Mayo 14, 2018, duna na sab ba kaha'y mga bag-ong hagit sa kabatan-onan?

Kagahapong adlawa, human sa usa ka adlaw nga lugway, natapos ang filing sa Certificate of Candidacy (CoC) ug ning mga taknaa, naghinam-hinam ang mga kabataan nga mikandidato nga ilang mabati kun unsa ang kalibutan sa politika.

Sa sikat nga panultihon sa Bayani nga si Dr. Jose P. Rizal iyang giingon nga, "Ang kabataan ang pag-asa ng bayan". Buot pasabot, dihang linghod pa ang ilang kaugalingon, bansayon na sila sa mga butang nga sila ang manguna diha sa ilang palibot.

Sagad kana ang haum nga tubag sa maong panultihon sa sama sa mga kaniadtong kabatan-onan, apan unsa kaha ang kabatan-onan sa modernong panahon?

Teknolohiya ba kaha ang tubag sa ilang epektibo ug mas halapad nga panerbisyo sa sama nila nga kabatan-onan sa ilang ginsakupan?

Manghinaut kita nga pinaagi sa tabang sa maayong paggamit sa teknolohiya, mas mapadangat pa sa kabataan ang ilang tinuod nga kontribusyon sa komunidad.

Kini ang usa sa mga hagit karon sa kabatan-onan kun unsaon nila pagpadangat ang ilang serbisyo sa pag-ubay sa teknolohiya.

Unta di maabuso sa kabataan ang teknolohiya, labi na kun ila kining magamit panahon sa kampanya. Magrespetohay unta diha sa mga comments sa Facebook basin unya didto mahitabo ang linabayay og pagpangdaut.