DI MAAYONG balita alang sa mga tawong mahiligon sa ilimnong makahubog.

Giaprobahan na sa House Ways and Means Committee ang substitute bill nga nagtinguha sa pagpataas sa excise tax rates sa mga alcoholic drinks sa nasud.

Tinguha sa maong balaudnon nga patas-an og P6.60 ang excise tax nga ipahamtang sa mga alcoholic drinks, kumpara kon unsa ang gipatuman sa Republic Act 10351 o ang balaod alang sa excise tax sa mga alcoholic drinks ug sigarilyo.

Giaprobahan sab sa komite ang P650 unitary rate alang sa mga sparkling wines.

Samtang, patas-an sab sa P2.10 ang buhis sa mga still ug carbonated wines, samtang ang dunay alcohol content nga mas taas sa 14 percent patas-an sab og P4.10.

Ang giaprobahan nga tax rate sab alang sa fermented liquors gipatas-an og P2.60.

Ang committee report sa balaudnon isumite na sa plenaryo sa Kamara alang sa himuong deliberasyon niini.

Di man tuod ang manginumay ang mobayad sa gidugang nga buhis sa mga produkto, apan seguradong maapektuhan gihapon kini sa ipatong unya nga dugang presyo sa mga negusyante og ilimnong makahubog.

Kini maoy di maayong balita alang sa mga tawong di mahimong di makalala og alak, ikumpara niadtong way hilig niini.

Kay segurado man gyud nga mangita og paagi ang mga negusyante og alak nga mabawi ang nagasto sa buhis sa ilang mga produkto.

Duha ang puwedeng mahimo sa hilig og ilimnong makahubog. Una mao ang paghinay-hinay sa pag-undang sa bisyo. Ug ang ikaduha, mao ang pagpangita og laing alternatibo, kon di gyud makaya pa nga moundang niini.

Usa sa mga alternatibo nga mahimo, mao ang pag-inom na lang og tuba inay sa mga mahalong klase sa ilimnon. Bisan tuod kon medyo mitaas sab ang presyo sa tuba ning panahona, apan maayo na lang itandi sa beer o mga hard drinks.